ალავერდის საკათედრო ტაძარი მდებარეობს კახეთის მხარეში, ალაზნის ველზე. მონასტერი ერთ-ერთი უდიდესი საეკლესიო ნაგებობაა საქართველოში, რომლის სიმაღლე გუმბათის ჩათვლით 50 მეტრს აღემატება. კომპლექსში შემავალი ნაგებობებია: ალავერდის წმ. გიორგის საკათედრო ტაძარი, გალავანი, სამრეკლო, პალატი, ფეიქარ-ხანის სასახლე, მარანი და აბანო. ალავერდის მონასტერი VI საუკუნის შუა ხანებში დააარსა იოსებ ალავერდელმა, ერთ-ერთმა ასურელ მამათაგანმა. XI საუკუნის დასაწყისში კახთა მეფე კვირიკემ ალავერდის წმ. გიორგის პატარა ეკლესიის ადგილას ააგო საკათედრო ტაძარი, რომელიც უმთავრესად ალავერდის სახელწოდებითაა ცნობილი.