ანჩისხატის ტაძარი თბილისის ძველ უბანში, იოანე შავთელის ქუჩაზე მდებარეობს. იგი VI საუკუნით დათარიღებული სამნავიანი ბაზილიკა და თბილისის ყველაზე ძველი საეკლესიო ნაგებობაა. ღვთისმშობლის შობის ტაძრის დღევანდელი სახელწოდება 1664 წელს სამხრეთ საქართველოდან – ანჩის მონასტრიდან აქ ჩამოსვენებულ მაცხოვრის ხელთუქმნელ ხატს უკავშირდება. გვიან შუა საუკუნეებში ანჩისხატის ეკლესია სასულიერო და კულტურული ცხოვრების მნიშვნელოვანი ცენტრი იყო. აქვე ხდებოდა ქართველი უფლისწულების აღზრდაც. 1755 წელს ერეკლე II-ის ხელშეწყობით ეკლესიასთან დაარსდა საერო სკოლა და სასულიერო სემინარია. სემინარიაში საღვთო სჯულსა და საეკლესიო ისტორიასთან ერთად გრამატიკას, პოეტიკას, რიტორიკას, ლოგიკას, ფიზიკას, ფილოსოფიას, არითმეტიკასა და ქართულ ენას ასწავლიდნენ. ტაძარი მრავალჯერ დაზიანდა და აღადგინეს, მან ჩვენამდე გადაკეთებული სახით მოაღწია. ანჩისხატი თბილისის ერთ-ერთი უმნიშვნელოვანესი კულტურული ძეგლია.