ბაგრატის ტაძარი მდებარეობს ქალაქ ქუთაისში, მდინარე რიონის მარჯვენა ნაპირთან აღმართულ კლდოვან ბორცვზე, რომელსაც უქიმერიონს უწოდებენ. ღვთისმშობლის მიძინების სახელობის ტაძარი, აგებულია 1003 წელს, ბაგრატ III-ის  მეფობაში. ძეგლი წარმოადგენს ქართული შუასაუკუნეების საეკლესიო არქიტექტურაში საეტაპო მნიშვნელობის ტაძარს, როგორც თავისი არქიტექტურული გადაწყვეტით, ასევე ისტორიული და სიმბოლური მნიშვნელობითაც რადგან ის ერთიანი საქართველოს სიმბოლოა.