გელათის მონასტერი – ქართული ხუროთმოძღვრული ანსამბლი, შუა საუკუნეების საქართველოს კულტურის უმნიშვნელოვანეს ცენტრს წარმოადგენს, რომელიც აგებულია ქალაქ ქუთაისის ჩრდილო-აღმოსავლეთით, მდინარე წყალწითელის ხეობაში. მონასტერი დაარსებულია დავით აღმაშენებლის თაოსნობით 1106 წელს. სამონასტრო კომპლექსი შემოზღუდულია გალავნით, ანსამბლში შედის სხვადასხვა დროინდელი (ძირითადად XII-XIII სს.) შენობები. გელათის მონასტერი არის იუნესკოს მსოფლიო კულტურული მემკვიდრეობის და საქართველოს ეროვნული მნიშვნელობის კულტურის ძეგლი.