მარტვილის კანიონი მდებარეობს სამეგრელოს მხარეში, კერძოდ მარტვილის მუნიციპალიტეტში. ბუნების ძეგლი წარმოადგენს მდინარე აბაშის მიერ აბდათის კირქვული ქანებით აგებულ ანტიკლინში, კანიონისებურად გაჭრილ ხეობას. კანიონის სიგრძე ჯამში 2400 მ-ია, სადაც წარმოიშობა 12-15 მ სიმაღლის ვარდნის მცირე ჩანჩქერები. კანიონის „დადიანების საბანაოდ“ ცნობილი მონაკვეთი განსაკუთრებული სილამაზით გამოირჩევა. ქვით მოკირწყლული 700 მ-ის სიგრძის წრიული საფეხმავლო ბილიკი ვიზიტორთა ცენტრიდან იწყება და გაივლის დადიანების ისტორიულ ბილიკს. ბილიკზე განლაგებულია 2 ხიდი, 3 გადასახედი პლატფორმა, კირქვის დიდი ლოდებისგან აშენებული 30 საფეხურიანი ისტორიული კიბე. ვიზიტორებს ასევე შესაძლებლობა აქვთ გაისეირნონ ნავით მდინარე აბაშის მონაკვეთზე და დატკბნენ მთის მდინარის კანიონის ულამაზესი ხედებით.