მეტეხის ღვთისმშობლის შობის ეკლესია ერთ-ერთი უძველესთაგანია თბილისში აშენებულ ეკლესიათა შორის, რომელიც ისტორიული უბანი მდინარე მტკვრის მარცხენა ნაპირზე კლდოვან შემაღლებაზე ავლაბარში მდებარეობს, ისტორიული წყაროების მიხედვით ეს ყველაზე ადრეული დასახლება იყო ქალაქის ტერიტორიაზე. ტრადიციული რწმენით მეფე ვახტანგ I გორგასალმა აქ ეკლესია  (მეტეხის ღვთისმშობლის შობის სახელობის ტაძარი) და ციხესიმაგრე აღმართა, რომელიც ასევე მეფის რეზიდენციის ფუნქციას ასრულებდა. აქედან მომდინარეობს სახელი მეტეხი. ამ ადგილზე, V საუკუნეში წმ. შუშანიკ წამებული დაკრძალეს. ტაძრის აშენებას VI საუკუნეში ადასტურებენ მკვლევარები. გადმოცემის მიხედვით მეტეხის კლდე წმიდა აბო ტფილელის წამების ადგილი უნდა ყოფილიყო (VIII ს.), რომელიც თბილისის მფარველი წმინდანია. მეტეხის ეკლესიიდან ხედები იშლება ძველ თბილისზე, ნარიყალას ციხესიმაგრეზე, აბანოთუბანზე, მშვიდობის ხიდზე, რიყის პარკზე. ეს ადგილები ძველი თბილისის სახეა.